賭收跌波及球圈

受外圍因素影響，澳門賭收持續下跌，唔單只政府庫房縮水，整體經濟亦受波及，各行各業唔多唔少都受牽連，難以獨善其身。就算體育界亦不例外，好似今年的七人足球錦標賽，就少了三支甲組球隊角逐。

澳門賭收已連跌十四個月，按年下跌近三成半，上月賭收已逼近政府需要實施緊縮開支的“警界線”。整體經濟持續不景，以社團文化支撐的澳門業餘體壇，自然受拖累。在澳門，體育社團多不勝數，絕大部分都靠背後有老闆撐起，當中不乏與賭業相關的人士。賭收持續下跌，老闆“閂水喉”亦屬人之常情。

澳門足球圈多年來都靠有心人出錢出力撐起，日見蓬勃。如今賭收下跌，球圈難免受到衝擊。預計月底開鑼的甲組七人足球錦標賽，有三支近幾季在經濟好景時大搞的球隊，今年都“縮沙”直接退出，令參賽的甲組球隊由近年的十六隊減至今年十三隊。坊間收到風，退出球隊估計都是與經濟不景有關。

幾支退出的球隊，近兩年參賽都係招兵買馬，邀請不少猛將或鄰埠的名將加盟，成為爭標的有力分子，突然間唔玩，肯定係球迷損失。至於其他參賽球隊，引援上亦可能要“勒緊褲頭”，睇餸食飯。這項最受球迷歡迎的本地甲組賽事，今屆的分組賽只能分一組七隊，另一組六隊作單循環。比賽肯定少了，只希望精彩程度不減。相信只要有好波，球迷依舊會繼續捧場。

賈大廚