賭海18載-5集

上文提到第一次喺澳門借貴利，跟住仲被家人知道左我咁鍾意賭錢，要佢地幫我頂左條6萬數。第二日還完錢果晚，屋企人仲全家陪我去睇Titanic。經過哩次大教訓之後，我當然好後悔並再次承諾唔會再賭。但係，宜家諗返起，覺得今次雖然闖左大禍，但條數屋企就咁幫我頂左，對於我黎講，解決得太過容易喇，可能咁樣就埋下左以後更多更大嘅伏綫。

經過哩次下學期基本都係乖乖仔，返學放學，幫人補習還債，成個學期都冇諗過去澳門。但係，卡數就開始打到埋黎，好多細節已經好模糊，淨係記得不知不覺忘記曬上次借貴利嘅禍，後尾又過返大學，我記得去到year 2暑假嘅時候，我已經總共有15萬卡數，好記得當時我好怕電話嚮，因為驚係銀行追數，果陣果個Nokia經典鈴聲，我好怕。哩段時間，好多零零碎碎嘅印象好模糊，但有樣野，冇得唔記得。大家應該仲記得ICQ嘛，我大學期間掛住賭錢，都冇心情追女仔，談情說愛，但間中都有寂寞。當年4，5月份，我開始無聊玩icq上網識下女仔，睇下有冇運溝返條女調劑下。後尾識左個女仔叫做"小鬼"，細我4年，當年我21，佢17歲，我當時好on9, 通常一開波我就問 "Can I be your bf?"....唔同女仔會有唔同反應，小鬼就係比較啱傾，我地維持左2個月嘅網上關係，間中有傾電話，我又成日口花花，當時大家未見面都有少少戀愛嘅感覺。好想出黎見對方。終於有一日，暑假期間，我鼓起勇氣約佢出黎夜晚旺角中心等，佢帶埋一個Friend出黎，記得當晚小鬼見到我頭半段完全唔敢正面望我，後尾知道佢好似喺面到生左粒大瘡驚比我見到。當晚首先去九龍城食糖水，跟住觀塘唱K, 喺K到，我就趁佢個Frd去厠所，就連隨起勢咁大大啖車落小鬼度，就咁我地就咁樣一齊左。當晚表面上我係一個大豪客，當然全程洗費我出啦(但其實個戶口得果3千幾蚊，再加背後一大堆卡數)，第二日朝早小鬼仲跟左我返大學宿舍訓覺，但我好紳士架，當日我冇掂過佢，淨係攬下錫下咁。拍拖第3日，我約左佢去旺角花園餐廳鋸扒，食完之後送佢返屯門就去左大會堂都一面飲酒一面談心。唔知點解，果晚我好唔開心，可能覺得個女仔都幾好，自己咁嘅環境唔想連累佢，所以突然間我講左句"不如我地分手咯"，佢問我做咩事，我就將我去澳門賭錢嘅事一一講曬比佢知，我仲話自己周身債，總共已經差唔多欠人30個。佢靜左幾秒，從後攬住我同我講"唔可以分手，我地一齊還債啦"，天真嘅佢仲話"我可以試下叫Daddy幫你還"(因為佢老豆喺大陸開廠有啲貨)。就咁樣，我都比佢打動左冇再提分手，繼續一齊。果段時間差唔多日日都見面，有愛情滋潤一直都冇賭錢。

直至有一日，奪命追魂銀行卡數又黎了，我冇辦法之下又諗去賭解決，但冇賭本。左諗右諗，諗到問我一個要好中學同學阿K(此人在第2集出現過，當時佢仲吊我去澳門賭錢果個)，打去講大話(我都唔記左用咩大話了)，佢好快就應承借2萬比我，錢到手我就飛奔過大海了。可惜，所謂財不入急門，一陣就輸曬了。此時此刻，又喺臨走一刻，有條類似扒仔30零歲，問我哥仔使唔使幫手,我搭左幾句爹話唔使唔使，我就由沙圈開始準備離開葡京，行到差唔多到門口，條友居然追出黎，yo我攞幾蚊去到啦，仲講左句輸左過黎開工跟我搵食，分期還返都得，跟住攞埋自己張身份證比我睇，話大家都係香港人，佢自我介紹~叫阿聰。跟住我企喺度同佢傾左兩野，我就心諗，唉宜家大學都讀到不知所謂了，萬一輸左過黎做野可能都係條新血路，所以我慢慢又入左哩個"局"了。如常對身份證，查資料，我照舊都係同佢講我當差，一切都順利，攞兩萬蚊上葡京啲廳賭，全程啲碼放佢果邊，多數都係佢決定落注，我自己又唔好意思出聲攞返啲碼過黎，過左1個鐘度，黑仔始終黑仔，2萬又全數敗北。跟住就起身，條扒就話帶我去見老細，就離開打的前往回力(果次係我第一次去回力)，去到先去間茶餐廳，坐低之後就有2，3個男人坐低，言談間又提到過黎跟佢地做野呀等等，跟住就有個似係老細既坐低，又講過黎做野。跟住佢話，橫掂都過黎做野，攞多5蚊賭啦，輸左過黎做野好快搵返。果陣我已經冇曬分析能力，冇曬主見，就半推半就咁話"好"，諗住輸多5萬可以過黎做野慢慢還返啦。

跟住就去左回力啲廳賭，佢地攞左5萬黎，不過啲碼基本都係靠佢果邊，大家都有決定落注，間唔又幫我睇下牌。我印象中，真係好快，唔夠1個鐘，枱面冇曬，清袋一刻唔係太失望，個心淨係諗，疊埋心水過澳門搵食啦.......跟住佢地就帶左我去間酒店(LKF前身)，等左陣之前果個老細又出現，佢坐低話"ok啦，咁撚鍾意賭，過黎搵食啦"，我就頭up up咁話好。跟住佢就話一陣會叫啲手足同我返香港，仲吩咐佢手下過到香港入1000蚊比我用。佢話去我屋企目的係証實下我住果度。跟住就有一個同我差唔多大嘅仔同我一齊上船，全程都仲有講有笑。落船出左閘，就見到一肥一瘦兩個人喺到等我地，跟住條仔就話佢地兩個同我返屋企，仲提多次一陣返到屋企會入1000比我用，叫我返屋企執定野過澳門搵食。返到屋企門口，佢地肥瘦大盜就問我係唔係哩間，我話係。跟住就話去後樓梯傾下，行到去佢地就攤牌，話我條數比澳門啲貴利賣斷左比佢地香港哩邊嘅財務公司，根本就冇過去澳門做野哩回事，佢話借7萬宜家要還12萬。我真係呆左，佢地話要入屋通知家人。

果一刻我個心真係好似被雷劈咁，我話唔可以入屋呀，老豆有心臟病會激死佢㗎，我話何況入到去佢地都冇錢，佢話咁冇辦法死都要入屋。我就話等等，比我打電話試下問人借。第一個我就打比我家姐，點知佢話人在上海出差，知道佢出差，我都唔敢再講落去發生咩野事，所以求其講左兩句就收綫。跟住再諗下打比邊個求救，諗起個有個大學友好師兄啲女朋友屋企幾有貨，冇辦法之下樣衰都要打比佢試下，跟住個師兄就話條女唔唔喺香港去左旅行，跟住我又收綫。最後，我決定打比我中學同學阿K(即係早兩日借左2萬比我同埋之前吊我賭錢果個)，接通左之後，我第一句就問阿K, "喂，有冇錢喺度？"(好明顯我語氣係好沈重果隻)，佢即時反應話"你要幾多"，我話"12萬"，佢回應"我宜家冇咁多喎"，我問"有幾多，真係救命，幫下我手"，其實佢已經大概估到我咩事，佢話可以即刻轉5萬比我先，其他果啲再諗辦法幫我籌，跟住我就同兩個騎龍講，佢話如果即刻轉5萬，ok,但最遲聽日要轉埋尾數加多5000利息。喺哩刻冇得諗咁多，跟住我地就離開左我住嘅大廈，出左去等阿K消息。兩隻騎龍知道5萬轉左，就放我返屋企。返到屋企，見到老豆老母我緊係當冇事發生過。跟住就入房再同阿K通電講述成件事，佢話尾數幫我諗下辦法，果陣中午12點左右，之後我就喺床上訓著左，但係我記得係訓得好差，個腦不斷諗住件事。大概下午4點左右，阿K就打比我，叫我夜晚出黎，原來阿k幫我打比好多我地中學嘅好朋友幫手籌期，出到去有幾個朋友喺度，有阿K, 阿浩，一個女仔朋友阿真。當時佢地就同我講個情況，阿真自己可以借1萬，佢又幫我問左另一個女仔同學阿街借1萬，阿k就話另一個冇黎嘅朋友阿量可以借到3萬。阿浩冇咩錢，但都夾到4000比我。阿K跟住話剩返果2萬搵唔到人借，佢再借埋比我。佢再講佢都打左比其他2，3個朋友，一係就話冇錢，一係就話因為賭而借錢唔可以。就咁，我就帶住好複雜嘅心情食完餐飯(又感激，又自責，又沮喪，又攰)，跟住就散Band, 哩幾個朋友都冇鬧我串我，只係簡單直接講叫我唔好再賭。跟住我女朋友就打比我問我喺邊，佢完全唔知發生咩事，跟住我就去旺角會合佢同佢啲朋友食飯(好似話佢契哥請)，夜晚大家都冇返屋企訓，就去左女朋友老豆間公司訓。第二日，最後果2萬都係靠阿K比埋我，跟住我就落女友公司樓下轉曬7萬零5千比貴利，哩件事就算係完結左。

過左兩個星期度，同阿K兩個出黎喺觀塘食飯，詳細講述我賭錢嘅經歷，同財務狀況。佢聽到我仲差人卡數，要罰好多息等等，佢真係好朋友到咁嘅地步，佢話佢仲有7萬喺銀行，借埋比我還左啲卡數，不過哩7萬要計返年息7厘，我當時感激之餘，就lue飯應了，食完飯各自返屋企，阿K話約好下次幾時比果7萬我.......(待續)

後記: 半年前家人幫我頂左6萬貴利嘅慘痛經歷，雖然year2下學期勤奮做兼職還錢，但喺債務上冇突破性嘅進展，當問題迫埋身嘅時候，過去所有嘅承諾一切都忘記得一干二淨，再次踏足賭場仲再次闖下如此大禍，已經接近萬劫不復嘅困局，難得有良朋知己幫助，尤其阿K,一個剛廿歲出頭嘅中學同學，一個2年前第一個挺身而出柒我賭錢嘅朋友，居然咁樣無私雪中送炭，有啲咁嘅朋友，我是否應該珍惜.....從此回頭以答謝。