賭海18載-3集

上回提到我同阿飛第一次一齊賭錢，成績已經非常唔錯。順理成章，我預期阿飛將會係我未來出生入死嘅賭友。

下學期終於開學，假期期間斬獲不俗，銀行存摺歷史高位。與幾位大學好友無聊提到自己喺澳門輝煌成績。好友阿周仲講笑問我幾時帶佢去搵食。由下學期，我已經開始慣性走堂，大部分時間都只會出現喺學校嘅兩個地方，足球場同canteen。經過左哩個精彩嘅假期，我條賭根已經毫無保留地暴露出來，慢慢已經冇心機返學，間唔中就心痕想過去。

哩日，亞飛打比我，話聽日放假想夜晚過去。夜晚練完波，就由西貢千里迢迢出去上環join阿飛。(其實今次係我地兩個第二次一齊出戰)由於都幾夜上船，所以已經預左會兩日一夜，去到入住帝濠安頓好後出發葡京。我1萬本，阿飛好似2萬。去到主力大細，兩個分頭玩，我一開始順到不得了，果時舊葡都幾多大細枱，連住嘅就喺隔離。喺一張枱玩下玩下就已經上水幾千，跟住見到隔離枱都好路，所以開始兩邊一齊買，每邊都買2000一鋪，嘩旺到吖，基本上鋪鋪都中，唔使半個鐘，我已經贏緊28000度。跟住同自己講到純利3雞就夠皮了。我就行去搵阿飛睇下佢咩境，可惜，佢2萬本輸淨6000苦戰中。老實講就算果陣叫我走，我都肯，但阿飛邊度肯吖，所以我地又分開，我又玩返大細枱。哩個時候，因為我只想到3雞就夠，所以我落注都係雞仔注，頂佢個肺，就係差果少少，到極都到唔到，慢慢運氣開始越來越衰，利潤淨番15000到，跟住又去搵阿飛，佢開始追番啲都係有15000左右，佢喺度買緊張開緊長龍小嘅大細枱（應該大約7個小左右），所以我地到追佢博佢開大，開始都係1千1千咁買，佢老味，繼續開多3鋪。哩個時候我同阿飛都少少著燈了，開始加大注碼追，3千，4千，5千咁買。可能我地賭齡尚淺，輸到著曬燈，深信總有一鋪會開大，我好記果時我地兩個都好似癲能左咁，一鋪一鋪死落去。結果係，直至我地手上所有籌碼都輸曬，"深信"果個大都仲未出現過。就喺哩張枱，我地就全清袋了。

仲賭唔賭好? 你話呢，都著能曬燈，冇理由比一張枱KO. 果時已經零晨時分，由於我地都係12點前喺香港㩒機，所以係可以㩒到了，我地各取一雞出黎再博過，可惜上上落落，大勢已去，最後都係輸埋果1萬，離開賭場時已經係朝早10點左右，攰到僕街咁行返酒店，原本我地都共識左返酒店就執野打道回港，但我一面行一面覺得好唔服氣，所以諗左條屎橋建議比阿飛。我話橫掂宜家都攰死，不如租多日酒店，訓醒都夜晚啦，等多3，4個鐘就12點，到時又有本錢賭了，最後佢居然同意左，可能大家都係憧憬我地之前果次嘅戰績，由於身上現金已淨不多，所以轉左間平啲嘅財神訓。總結當日，我輸左2萬，亞飛3萬。

訓到死左，夜晚8點幾起身，跟著去死飯消磨時間等12點。食完都仲有個幾兩個鐘，冇錢冇信用卡唯有返酒店on99吹下水。我記得喺房嘅時候，可能就黎有得賭，大家都有講有笑，搞埋啲傻仔gag, 我到宜家仲記得果個笑話，不過好難喺度寫.....因為有涉及聲音先做到搞笑效果，所以不能在此盡錄。講返正題，12點終於到，攞錢昂首返葡京報仇，果一刻我地都士氣高昂。再次經過漫長嘅7，8鐘嘅苦戰之後，大家期盼嘅結果冇實現，換言之，結果都係清袋而回，無奈離開。喺我地追數期間發生左一個小插曲，就係我其實曾經追到有2萬幾喺手，但果時亞飛又輸清，我比左1萬蚊籌碼佢賭。所以當大家都清曬袋之後，我應該係輸左2萬而阿飛係5萬.......

後記: 經過今次，阿飛受到重創，將上次贏果3萬幾全數歸還何生，仲要嘔突萬幾，我深深覺得佢唔想再過大海，從此之後我地冇再相約過大海。但係其實仲有一個主要原因，記唔記得當佢清袋時，我比左1萬佢賭，但係返左香港大約兩，三個星期之後我問佢手鬆唔鬆還返比我O唔OK,佢話冇錢。在之嘅數個月期間，我都問過佢好幾次，但答案都係一樣，就咁樣不了了之，一直都冇見過佢了。

自此之後，雖然發生不輸快事件，但仍不減我對澳門嘅憧憬，因為勝敗乃兵家常事，何況我仍有cash在手。

賭友阿飛因大敗後變得疏遠，唯有繼續過我嘅獨賭生活。喺一年級下學期餘下嘅時間，我當然繼續沈溺，已經慢慢成為人所皆知校內嘅隱形人。可惜，自從上次與阿飛一起大敗一役，似乎上天嘅眷顧開始狠狠地離我而去，由於過海次數頻繁，當中戰程發展印象已經非常模糊，只記得有贏有輸，但已經係2贏8輸。直至所謂嘅Honeymoon Year完結左之後，當時戶口已經係零，唯一有增冇減嘅係，信用卡嘅數量，陸陸續續，已經多左2-3張，當時總結欠應該大概係8-10萬到。

今年嘅暑假，搞波果個鴻生又搵我返暑期工。由於要日日返工，所以暑假期間都冇咩過海，當然主因係我嘅經濟已經嚴重拮据。直至暑假臨近尾聲有一日，銀行戶口傳來好消息，就係year2上學期嘅Grantloan已經透過自動轉帳到手，大約4萬蚊到，錢一到手賭引即起，當日就等唔切過海了，可惜.....一晚就將用黎交學費同半年生活費既grantloan輸得乾淨俐落。未去之前，完全冇諗過有輸嘅機會，冇諗過後果。宜家輸左返黎，徬徨萬分，點算？唔使講我屋企人係完全唔知我所有關於賭錢嘅事，所以基本上我係走頭無路。開學之後，原來可以向校方申請延遲繳交學費，所以第一時間先行哩步拖一拖。但係避得一時避唔到一世，始終一日都會到期。為左解決哩個困擾左我好幾個星期嘅問題，我又行前左一步，第一次要開口問人借錢，而第一個幸運兒就係鴻生，因為感覺上佢係我識嘅人最有貨(住太子道過千呎樓，又係老闆，又摣寶馬，又有2奶)，而且佢一直都好錫我。我同佢講我屋企冇錢比我交學費，由於係叫佢直接入大學嘅戶口，所以佢一口就應承。(當然佢其實冇問得咁仔細，或者佢諗到但冇出聲。佢大老闆可能唔知其實好似我地哩啲窮等人家，係會有grantloan的。)。

點都好，事情終於算係暫時解決。經過哩次痛苦嘅經歷，我冇諗過再過大海，可能原因都係冇錢。由於經濟嚴重拮据，由year2開始，我就搵左啲私人補習做，每個月都有大約有3，4千到收入，算係可以應付到啲min pay之餘，仲勉強生活到。喺哩半年嘅生活入面，真真正正體驗債台高築既辛酸，間中都會收到銀行追數電話。經常性銀包只得幾十蚊。又唔可以比屋企知自己咁黴。明明應該係一個生活健康，有魄力嘅20歲大學生，竟然淪落至此。當中有一次嘅感覺係令我最有印象。(year2上學應該係我上得最多堂既學期，因為冇賭本，所以集中精神返學)，果日如常返學，下午就離校到某屋邨一間補習社返工，約夜晚8點收工後，肚餓非常，路經麵館好想入去整返碗牛腩河，可憐將全身所有口袋銀包的硬幣都翻一片(身上窮到冇紙幣），才知道如果食完麵，就差兩蚊先夠錢搭車返宿舍，所以最終放棄。心裡好自責，大好青年，當日中學年代學妹們嘅崇拜對象，點解會將自己弄得如斯田地，喺果一刻同自己講，發誓不再踏入賭場半步.....(待續)

後記: 前人經驗，所謂"輸錢皆因贏錢起"已經開始報現喺我身上。當時嘅淨結欠大約有12萬到，過住唔應該係一個大學生要過嘅生活終日為還錢而煩惱。12萬對好多人未必係好大數目，但對於家境一般，仲讀緊書嘅我，算係一個從未想像過既數字。我從來冇去証實過，但直覺阿飛自從果次之後，佢應該冇好似我咁繼續沈迷落去，一早已經脫離險境，剩返我一個孤身上路。

預告: 過住痛苦生活，曾經向天發誓從此戒賭，為何又從踏賭場? 不守諾言，受到前所未有嘅惡果。