賭海18載-1集（轉）
睇左阿多的故事之後，勾起左好多自己喺賭博上嘅回憶，當中不得不贊樓主寫文嘅堅持。同時，計一計自己今年36歲，原來不經不覺已經用左人生一半既時間喺哩條賭博之路。18年，望住哩個數目，不由自主感覺唏噓。其實幾年前都想將自己賭博上既經歷記低，但又懶得寫。但睇到阿多既故事促使我有左動力，加上應承左老婆1年半內唔再賭錢，所以我想用哩段時間，回憶一下過去18年既事。我諗我既文章唔會好似阿多咁引人入性，因為當中好多賭局點樣發展基本已經忘記曬。我只會將過去既一啲仲記得而又一生難忘嘅回憶記得佢。
首先簡單介紹下我18歲前既背景先，1978年我出生於一個好簡單既家庭。父母大約70年代初黎香港，老豆打工，一世人都循規蹈矩，雖然間中會買6合彩同馬仔，但佢一向推崇刀仔鋸大樹，一生為家庭付出，可惜可能因為食煙多年，40幾歲就有嚴重心臟病，50歲就退左休了。阿媽做家庭主婦，佢係個好到不得了既阿媽，完全冇虛榮感，從來只會諗佢啲細路，比最好既野佢地，成世人就係為左家庭，就算到宜家70幾歲都仍然係咁。我家姐大我9年，所以老豆退休之後就係佢撐起屋企，好彩佢好生性，搵錢能力都唔錯，可惜唔知點解，從來冇見過佢有男朋友（肯定唔係基既），由於佢係大家姐，除左孝順父母，佢都好照顧我地兩個細佬。家姐係我心目中，佢係上天賜比我地既天使。到我阿哥，大我5年，佢基本算係個壞孩子一名，中四就輟學，溝女，打散工，浮浮沈沈，曾經有一兩年自己出黎做生意，搵到唔少錢，可惜冇攞過返屋企而係用左大部分係東莞某間KTV, 一年係果度使50萬，但我同佢自小關係都好好。
簡單說，我係生長係一個唔有錢既家庭，但好融洽，父母一世人都循規蹈矩，期望細路一個一個出身後，家庭既環境會一步一步改善。而事實上，係我19歲之前，屋企既發展係好健康既，由公屋搬去居屋，家姐大學畢業後收入慢慢好。
講返我自己，我仔既時期其實都算幾一帆風順，會考18分（我大學畢業，係當時父母對我最大既期望），讀Band one中學，最後都升入大學(西貢果間)。讀書果陣，朋友滿天下，加上自己係運動健將，係中學都算係風頭分子，加上個樣都可以（後生果陣，有唔少人話我有幾分似"肉酸托腮"），所以果陣喺學校真係直頭有粉絲，嘿嘿。簡單講，我中學時期基本係好平穩，好順利。但我同阿多少年時代好大分別，我思想上係完全冇賭，基本唔會同賭扯上關係。
我10幾歲果陣踢波好叻，機緣巧合，15歲到跟左一個開出版社既老細（化名:鴻生），佢好鍾意搞波比賽，所以自己搞左隊青年軍，我入左佢隊波之後，可能因為感覺我比較乖仔，可靠，所以入去冇耐我就做左果隊波既隊長，佢當我係半邊仔。果幾年間，我地一齊參加香港青年level既各大比賽，贏過唔少冠軍，最記得中五果年，我阿媽唔比我踢波，我瞞住阿媽話出去自修室溫書，但其實係去左參加決賽，最後仲攞左冠軍，有記者黎影相，我果日好驚會登上報紙比阿媽發現。我自己亦曾經被邀請加入當時時既奧運足球隊代表香港，但因為當年正要準備考大學，最後都拒絕左。
我諗你地已經係度吊緊我，係咪好悶呢？我要講哩啲背景，係因為以後既心路歷程，發展會有大既關係。點解要講踢波？因為我第一次去澳門就係去踢波!!!
18歲果年，成隊波跟左鴻生去澳門踢友誼賽，因為星期日早先踢，所以鴻生好好咁，比我地星期六就去，book曬酒店，當順便比我地哩啲啱啱出毛既仔，見識下咩野係澳門，咩野係賭場。果時對賭場真係冇咩感覺，淨係諗住見識下，所以我都好老實同亞媽講，仲氹掂佢比左500蚊我做本錢玩。到左星期六，估唔到阿鴻生第一個帶我地去既地方就係葡京。不過去到係先去2樓嘅西餐，食完之後，就係我第一次踏入賭場喇。我係賭場玩既第一樣野原來係老虎機，不過半個鐘就輸左200蚊(果次係第一次玩老虎機，但由於咁既戰績，果次都成為左我最後一次玩，咁多年都冇再玩過)，跟住就起身去二樓大撻地搵番喺度賭緊大細嘅隊友。見到隊友嘿仔，見到佢果陣佢好似輸緊400百蚊，佢當時應該係淨得最後一注錢，我冇買但睇住佢輸埋，喊曬口咁，跟住我就攞我淨返用黎玩果300蚊去左背面既櫃檯仔度唱籌碼開始玩，嘿仔就睇住我玩，我唔記得左啲牌局了，但記得我好順，10鋪中8鋪咁。應該都係一百一百咁買，好似係差唔多倒贏緊800既時候，我見住嘿仔好似好慘咁，所以我同自己講，哩鋪買曬800佢，如果中就比返嘿仔500，等佢唔好咁唔開心，真係中左，就比左嘿仔，佢好多謝我，我話都係贏返黎冇所謂，話曬我都係隊長，照顧下隊友。跟住我地就離開左賭場，行返出去二樓個餐廳，因為有啲隊友未夠秤唔入得賭場喺果度打等。因為鴻生同有啲隊友仲賭緊，冇野做所以喺二樓度行黎行去，有時又去左當時葡京三樓有機鋪的，有時又坐返係餐廳吹水。後尾悶悶地，同嘿仔話不如入賭場又行下，入到去買一鋪中左100，又出返去餐廳坐下，坐一陣，又入去買一鋪100，如是者，來來回回幾次都中。當時嘿仔都有少少斬獲了，我好記得當時我笑笑口講左句，一百一百咁執都幾好執喎!!! 最後鴻生吹雞返酒店，之後就冇再去賭場，第二日踢完波就返左香港。總結我第一次入賭場，贏左1600度。當時返到去感覺唔大，亦冇話想再去，只係覺得賭場啲錢都幾易執架喎，跟住就繼續做返好學生，運動健將。
我第2次去澳門，係我準備入大學果年既暑假喺鴻生到做暑期工做跟車，人工應該係4500，亦都係第一次打工。記得當日出左糧之後，放工攞住啲Cash, 第一次摣住咁多Cash.....原來一直埋藏左係我身上果條賭根終於第一次突然浮左出黎，加上首次戰績良好，所以膽粗粗自己一個人由觀塘搭地鐵去上環上船。果晚既進程係點我已經冇印象喇，只記得都係葡京同埋幸運之神沒有眷顧我，清袋而回。果次係第一次感受到一出糧就清袋，心情當然唔會好受。自此心中就冇再諗過要過大海，當然可能因為之後既時間都冇Cash係手。
放完暑假，正式踏入大學生活。好記得，第一日開學就曠課了，因為前一晚係friend做果間bar飲大左，訓過龍。第一日就開得咁衰，唔知係咪一早就應驗左我既大學生活唔會有好結果呢？由於家住沙田，所以攞到宿舍。我係Full Grant Full Loan的，一年有8萬幾，一半交學費，一半日常洗費，但第一啲錢係唔經我手的。讀頭半年都幾順利，識到唔少朋友，一齊屈蛇，一齊唱K，間唔時又出九龍浦下吧，落下D咁。自己又被選入左校隊，第一個學期都幾美滿。有一日，好多信用卡黎左擺promo, 我一直都冇諗過要申請，想就咁行過，但同房友見到個禮物幾正喎，係個吹氣梳化仔，我地就異口同聲開返張啦都冇壞。跟住又睇到另一間既唔知咩野禮物，又話申請埋。就咁樣申請左第兩張card, 一張Citibank,另一張係道亨，兩張都係15000額。申請左後其實都一直冇出事，一直都冇諗過要用。
直至上學期完左放假果兩個月既有一日，我返左沙田訓。我大佬鬼鬼祟祟同我講，叫我係信用卡到㩒6000借比佢。我初頭都唔知原來可以㩒出黎，好似銀行寄密碼，我都唔知咩黎。同大佬由細到大感情都好好，所以我應承左去。第二日記得㩒完6000之後，我袋住佢諗住夜晚見到佢比去，我跟住就去左機鋪打足球機，一面打一面諗野，一面我果條賭根又出左黎喇!!! 咁我就攞住果6000蚊，一尻返屋企換衫，同亞媽講有事要返學校(我阿媽好易呃....).....(待續)
後記: 一口氣寫左幾個鐘，宜家覺得好有動力繼續寫落去，因為透過一面寫，可以諗返起好多真係唔記得左既野，我都係啱先醒起係我既第一次借錢賭錢就係大佬導我升仙嘅。有人可能會話，鴻生(第一次入賭場)同我大佬(第一次教曉用card㩒機）係導我升仙既人，但我平常心諗，條賭根一日係度，唔係佢地帶我，我遲早都會有一日識去，識㩒。
