爛賭仔四十一事無成(續)

阿多在八月尾辭了地盤份工準備九月開學，所以佢亦收到這個月之人工(約七千多元)，當他收了錢後第1個念頭就想起1個地方，他年半前去過的地方，澳門賭場。於是他約埋其中1個同學(當然都是爛賭鬼啦)就去澳門賭場見識一嚇。阿多去銀行提取了六千元(因冇提款卡)就同阿日一起出發到上環碼頭去，去到碼頭買埋船飛2人懷著戰戰兢兢的心情出發去。在船上阿多和阿日一齊檢視嚇大家有幾多彈藥：阿多大約有現金六千元加獅子銀行戶口存摺一本(內有約千多元)，阿日有現金約三千元加提款卡一張(但戶口已冇$)，合共約九千元現金，而他們決定葡京為提款地方。在船上他們見有職員賣發發卡，咁梗係買嚟試嚇，雖然輸了，但一樣無損他倆興奮之情。

大約一小時左右，他倆就到了澳門碼頭，過關後就去揾的士出發到葡京去，到了葡京上了幾級樓梯入去發現左右兩邊都有類似搜身機的物體，阿多倆個當然唔驚，阿多過後到阿日過，但當阿日過時突然有響聲，嚇得我倆唔知發生乜事？後來賭場職員問阿日袋內是否有鎖匙，才知原來因為這樣所以響起來，由於只是小問題，所以阿多和阿日就大大步進入賭場去，入到去向左行有一張大細枱，很多人圍住投注，咁我哋梗係望嚇慢慢嚟啦，過了一陣有個荷官話買定離手跟住在旁邊有個鐘的物體叮了幾嚇跟住就揭開黑色的骰盅了，由於阿多倆個冇買所以唔記得開乜，接著他倆繼續遊枱(由於這是阿多第1次去葡京，感覺很大，比之前去嗰間大很多，所以他對葡京各方面都感到興趣)，其間阿多倆個亦經過一啲百家樂枱，但由於佢哋唔識玩，更加唔識規矩，只知9點是最大，所以望了一陣就算了，最後
繞了一個圈又去番之前第一張大小枱，這時阿多和阿日看見一排4行之攤路骰之前原來開了5個大，所以就決定一齊買細，阿多亦發現原來最低投注額可以是$50，其他點數$20就可以了。雖然可買$50但阿多和阿日依然各買一佰，並且每人親手張一佰元放在細上，叮叮……，開盅，2，3，4，9點小，阿多和阿日十分開心，並在等派彩，他們見荷官用個驗鈔機照下張一佰蚊，然後就將一個黃色的籌碼連同原本張一佰蚊比番阿多，阿多第1次投注又第1次收籌碼當然十分興奮，但他可能也沒想到在往後的日子他還投注了千千萬萬次，投注的總額亦是以千千萬萬計。

在外圈賭了一會，阿多和阿日上上落落，冇乜輸贏，佢哋見有扶手電梯可以落下一層，於是就決定落去睇嚇，當他們落到下低，發現全部都是百家樂枱，雖然他倆對百家樂的興趣不是很大，但對賭博卻有非常濃厚的興趣，於是亦一路睇嚇點玩，學嚇規例，但始終都不太明白幾時博牌，幾時不用博(因佢哋並不熟悉牌例)。看咗一陣阿多和阿日就從另一面的扶手電梯上番去，跟住就走到內圈裏，發現有21點枱，MinPay都是$100，於是倆個就坐低和其他人一齊玩，在賭的過程他倆學懂原來除了2隻相同的牌可以分和11點可以加注外，原來5隻牌唔爆原來也可以即收一半，另外3條7和同花6，7，8原來亦可以即收3倍，(Bj都是倍半)，這些規例(又或者叫葡京規例)都是阿多他倆以前唔識的，玩咗好耐，因佢哋想學更多又或者因為對賭太有興趣了，最後每人都輸了千多元，於是亦決定離枱。

阿多和阿日望嚇隻Gshock，發現原來已經差不多8點了，所以亦覺得很肚餓，於是就出外揾了間餐廳(好似叫樂宮或樂天)食嘢，順便回顧一嚇剛才賭博之過程，雖然輸緊$，但他倆都沒有太不開心，可能因佢哋本身已經是一個賭開$的人，而且佢哋覺得喺賭場真係見識很多，所以吃完飯後便再去學習，在場中阿多見到有張雀九枱，最少$200，阿多見有1至9號膠牌在枱面，正想買但迫埋去已發現全部9門已比人買齊，所以唯有等下舖。過了一會荷官重新洗牌，並又將1至9號膠牌放回枱面，這次阿多很快便把2個$100碼放在3號膠牌旁，心諗今舖終於可以賭和看牌了，誰知就在這時竟然有個人放了1個灰色碼在阿多的碼旁，阿多一睇就知個碼面積較大，一定買得大個佢，咁唯有賭，但冇得睇。荷官打骰後跟住派牌，咁阿多當然冇份睇，唯有望嚇同佢買埋同一門嗰個人，這人看過牌後亦比阿多望嚇，7筒8筒，5點，心諗PK，莊開，2筒6筒，8點，輸咗。跟住買多舖$200，那人一樣買一千，看牌1筒5筒，6點，莊開4筒4筒寶子，又全殺，因此基本上大部份的賭客都已經轉枱，但阿多和阿日見難得冇乜人玩，於是就各買一門$200，可能他們想看牌吧，阿多一睇，7筒白板，阿日是3筒6筒，莊開1筒2筒，他倆各收$190，既然贏又有牌睇，阿多和阿日梗繼續，雖然都是輸多，但他倆亦覺十分好玩，什至乎有時不看牌試用手甩，玩了十幾舖後，有個點火佬問阿多倆人打唔打莊，三千元已可打，阿多和阿日梗唔敢打啦，玩多陣阿多望嚇銀包只剩三千元，而籌碼只剩幾佰，阿日仲慘銀包只有$100而籌碼亦只有幾佰，於是阿多借咗一千比阿日，跟住又打遊擊。

如是者2人玩嚇大細，21點，雀九，魚蝦蟹(其實都是大細枱，不過冇三軍)，手上的資本當然越來越少，跟著佢哋決定再搭扶手電梯上多層望嚇，不過佢哋見到唔係賭廳就係百家樂，大細枱又唔開，於是兜了一圈2人又落番大圈去。望嚇隻Gshock發現原來已經1點幾了，經商量後決定先醫肚後繼續。食飽後又番賭場去，倆個賭嚇輸啲賭嚇輸啲賭嚇又輸啲
，最後阿多和阿日手上的籌碼已輸光，阿多隻剩下一張大牛，再望嚇錶已是淩晨4點幾了，佢哋決定等朝早去銀行攞$買船飛走，咁既然有後著，手上的大牛很快就變成籌碼，而這5個黃色籌碼很快又變成何生之籌碼。

當最後一舖阿多買大，但骰盅一開，1，4，4，9點小，阿多手上後一個籌碼也輸埋，當其時佢同阿日梗係有啲失望啦！再加埋當時只係五點幾，距離銀行開門還差幾小時，正當大家唔知點算時，阿曰發現銀包還有一百元，咁阿多又梗係揾嚇銀包會否重有$啦！雖然揾唔到，但重有一百元佢哋都已經喜出望外了。他倆商量究竟去飲茶等銀行開還是繼續賭？結果大家都估到啦！由於只餘一百元，所以阿多和阿曰非常謹慎，遲遲也不下注，遊了很久，行過大細枱，想買細，開3，4，6，13點大，好彩冇買，行去另一張又想買細，2，2，5，9點小，心想真想小，為何不買？就這樣行來行去，想買又唔敢買之間，最後去到一張21點枱，阿日就坐下將一百元給了荷官換成籌碼，放在枱上投注，同枱還有另外兩門，荷官派牌，阿日甩，第1隻A，咁阿多和阿曰梗嗌公，公，公，點知公就冇啦，而是來多隻A，本來玩21點有2隻A是所有玩家夢未已求的事，但阿日和阿多卻你眼望我眼，心諗PK冇$分，就在心諗唔知點算時，荷官已問分唔分？當時阿日和阿多冇理由話俾人聽佢哋冇$分，又唔識問其他玩家夾唔夾？最後唯有要牌，第1隻是公，第2隻…………都是公，22點爆，當時隔離個玩家都用一些訝異的眼神望住佢哋，從他們的眼神阿多和阿曰都聽到他們講做乜2隻A都唔分呀，識唔識玩架？而在阿多和阿日的心裡其實想答佢哋我唔係唔識玩，只不過是冇$分唧，你估我哋唔知2隻A要分咩，就這樣阿日和阿多就急急腳離枱了，因佢哋除咗無奈和瘀外，都唔知點。

阿多和阿日行開咗後，當然xyz#一番啦!由於當時都未夠7點，銀行又未開，倆個咪唯有繼續遊。阿多摷嚇褲袋，發現還有幾個$5硬幣(一定是之前抽水之$)，咁佢梗叫阿日揾嚇有冇$5或其他碎碼，最後倆個加埋都有4，5拾碎銀，去食嘢又驚唔夠，最後決定都係等銀行開門攞完$先食嘢。問完人獅子銀行係邊，行嚇問嚇，終於見到，不過都未夠8點，咁唯有兩個喺銀行門口吹嚇水等佢開門攞$。好不容易終於捱到9點，阿多咪入去攞$。點知…………個teller同阿多講佢嗰本是香港存摺，不能在澳門銀行提款，阿多和阿日當堂呆曬，阿多梗問為何大家都是獅子銀行但不能提款，問咗幾次都話攞唔到，最後他們懷著失望之情而離去。

這時阿多和阿日有啲驚(因冇$買船票)，但後來諗嚇可以叫香港的朋友入$落阿日的戶口咁阿日就可以用提款卡攞$。由於佢哋只得幾拾元港幣，問完人後原來在電話亭打長途要葡幣，於是就換了些葡幣打長途俾香港的朋友，阿月。好彩都即刻揾到佢並叫佢入五舊落阿曰之戶口。等咗個幾鐘，阿日得間就咁嚇機睇嚇入咗未，終於見到但只攞到四百(因要扣手續費)。佢哋攞住四百，知道買飛肯定300有找，由於十分肚餓，於是就在沙地球場附近間茶居吃排骨飯和點心，吃飽後就坐的士到碼頭去，買完飛過關上船，之後阿多和阿日就帶著疲累的身軀回港去…………(續)

以上內容純屬虛構，如有雷同，實屬巧合

後記：阿多雖然第1次在賭場賭錢大敗而回，仲攪到差啲留落異鄉，但他並未有因此而被嚇驚，反而只在想下次去賭場應該點做，同埋他心裡覺得他還有很多的賭博方法是未識的，阿多對賭的求知慾是多麼的強烈，興趣是多麼的濃厚，試想想如果他把賭的興趣，時間和努力放在其他地方上，相信一定會有一番成就，只可惜…………

之前有人教咗我點樣可以save落手機，之後可以攞番出來再打，但寫咗咁耐其實手指的確是很累的，什至乎手指的皮也好似損咗，有小小想放棄，不過又想和大家分享阿多的故事，真是十分矛盾。