賭收連跌見不怪

任職賭場主管之同樓住客，見其樂得清閒，莫非放大假乎？佢話吊頸都要唞氣。

賭收連跌，大部分賭場閒日曬蓆，只靠假日撐場，為求止瀉，高層要求主管諗計，開拓客源，開源節流。坐得呢個位，食得呢碗飯，都要想辦法，壓力相當大。仁兄難免“鎚仔揼釘釘揼木”，叫下屬加大打電話、發短訊搵舊客力度，畀多些着數，送客房或大優惠，“小財唔出，大財唔入”，搞些娛樂噱頭，盡施渾身解數引客。

上月，六賭企推出飲食優惠，只要出示澳門身份證，凡光顧賭場食肆，一律八折收費，豐儉由人，遂吸引眾多本地客幫襯，賭場食肆做到生意。不過，光顧者多是家庭客，只在賭場周邊商場逛逛，較少有興致玩兩手，就算行入賭場，都係睇熱鬧多，實際無助增賭收，但也算是回饋本澳市民。

然而，在市面經營的中小企食肆，有老闆、主管話賭場扯客，生意有跌冇升。是否如此，又不見得，主要係市淡，內地大客少，市民卻比前消費謹慎。

亦有任職莊荷的街坊話，現時去旅行方便得多，唔使提早申請假期，公司鼓勵放無薪假，有些賭場放幾耐都得，暫時唔驚炒魷。佢話近月客少，很多賭檯水靜鵝飛，索性唔開。

大喊救命的，還有賭場內的大型商場，這些專賣高檔時裝、珠寶及名錶的名店，講真係全球性，就算賭場當旺時無生意，一樣撐到現在，有本錢，蝕得起，旨在宣傳，目的係店舖開至全世界，加大影響力。弊在當職員的收入卻插水，以往銷售名錶，大款出手闊綽，掃貨三五隻視等閒。時移世易，內地打貪兼經濟下行，豪客冇影，如今名錶、珠寶店生意“水瓜打狗，唔見大截”，職員就當“好天搵埋落雨柴”，暫時吃老本，到食肆消費，亦冇以前咁大手筆矣。

行內人冀下半年有新賭場開幕，相信會吸引若干內地客，事關有過往經歷，內地客總愛試新場。不過，世界性經濟一沉未起，內地經濟亦在調整中，如無利好因素，相信下半年賭收無甚改善，如能保持穩定收入，不再下滑，阿彌陀佛矣！

羅倫斯