娛樂新場逆市上

StudioCity逆市開幕，一衆夜鬼深宵踩場，特意與其他新派賭場作比較。

新濠影滙搏盡，耗資卅二億美金打造，邀國際名導演、巨星壓陣，連樂壇天后MarieClaire也來捧場，極一時之盛。瑪麗嘉兒係當紅Singer，與另一流行天后、抒情女王、拉斯維加斯女王CelineDion齊名。加上曾演《教父2》之羅拔狄尼路，星光熠熠，大卡士矣。老羅拔係奧斯卡影帝，曾在一套的士司機電影對白“你同我講嘢呀？”，成為傲慢經典名句，不少人有樣學樣。

入新場，第一先搵停車場，穩陣腳，點行都得。新濠影滙前稱星麗門、東亞衛視影城，近金光大道中後段，唔怕水尾，皆因夠大座，隔籬巴黎人之鐵塔最易認。其門面夠闊大，流光溢彩，頗有台型。

入內大到冇影，先見識摩天輪，再上二樓搵“蝙蝠俠”，對正就係魔術表演場。此層有得食，有得玩，宜合家歡。食肆、店舖似足紅窗門及議事亭前地，鋪埋葡式石仔路，成中區縮影。

伊人愛扮靚，話要行商場，一衆男士當做“秦祥林”，睇睇高級秋冬時裝也無妨。商場富麗堂皇，幾乎走一圈，行到腳軟。單是看其酒店、商場佈局，唔明白新濠影滙點解自降身價變四星。

雖無爛賭二在陣，參觀娛樂場少不免。賭場擺設悅目，賭檯、角子機全新，位置闊落，賭客落注舒適，有閒之士打機，更覺輕鬆。惟半夜客少，非假日晒蓆，要靠周六日，有排翻本。

新場投資大，多了些非博彩元素，料吸引家庭客，社會寄望賭收止跌回升，但主要看大環境，須吸引海內外高端客來澳。現時各大新派娛樂場商場特多，高級貨品琳瑯滿目，惟逛者多，買者少，真不知商舖點維皮。當然國際名牌蝕得起，但長蝕亦係一條數，隨時會收手。

娛樂場名店仍靠內地客，特別某些隱形富豪勿睇少。朋友間名店見有衣衫襤褸者入內，無後生店員理。朋友捱義氣上前招呼，諗住得個吉，孰料竟做一筆三百多萬大生意。此客用報紙包住大疊銀紙，一百文張人仔付款，幾百萬唔講得笑，經理數到手軟，但足令同事羨慕，大嘆走寶。

羅倫斯