賭海18載-4集
上回提到，經過大約半年嘅蜜月期，我嘅賭博手風已轉下玻，手頭所有現金輸掉，仲多左2，3張卡。跟住仲輸埋year2第一個學期嘅Grantload,冇錢交學費，迫於無奈，問搞波鴻生借2萬交學費，總共欠債12萬左右。上學期餘下時間都冇賭錢了，過著非常潦倒嘅大學生活，並立誓不再踏足賭場半步。
但係，敢問你地身邊有幾多個賭仔係誠實可靠，堅守諾言吖?我唔敢話冇，但一定少之有少，只係程度有高低姐，而我嘅程度就係零信用，零自製。大約聖誕節假期，下學期嘅Grantload出左了，一如既往，當知道身上有錢，雖然曾經有內心爭紮過，但始終敵不過賭癮(其實諗返果時已經成了病態賭徒)。不過今次醒目啲，經過上學期嘅教訓，第一時間交左2萬學費先，攞住2萬本就過海。久別重逢，原本諗住之前嘅黑氣會離我而去，點知都係清袋收場，回港過一個痛苦嘅聖誕假期。假期期間，實在太無聊，賭癮難頂，最後做左一個最差嘅決定，問人借錢賭。上次都係因為冇錢交學費問鴻生借錢，但今次係直頭借錢賭錢.......跟住我就問左一個幾啱傾嘅校隊隊友阿H借左2萬蚊,可能真係好啱傾，我不忌諱同佢講啲錢係用黎過大海嘅，但係話會好快還返比佢(我當時諗，輸左最多開多兩張卡還比佢)。我印象出發果日係新年年初5，6到，澳門好多人。因為啲賭本係借嘅，所以全程都戰戰兢兢，好彩俾我喺葡京2樓中場撞到個阿伯賭神，跟左佢賭左十幾口全中，最後我連本帶利攞返5萬回港，坐船未返到香港未落船就打電話比個隊友約佢喺旺角比返2萬cash佢，見到佢現兜兜當眾比佢，佢仲嘩大嗱嗱2雞現金好揚，我心諗你都未見過大蛇痾尿，自己仲有少少沾沾自喜，跟住就分開左。
果次之後，仲有2星期度就要返學，有3萬賭本喺身，點會放過機會，來來回回去多2，3次度都係有贏有輸，戰程冇曬印象了，但臨開學前嘅一次，喺有生之年唔會忘記。果次手頭上應該淨返20k度，輸埋哩次就冇曬，可惜戰鬥完一整日，直至大約晚上9~10點結果都係輸曬。喺最後一注輸埋，轉身準備離開賭場之際，一個講野帶點口音嘅40零歲女人，好樣衰的(估計佢係目睹我清袋嘅過程)，佢問「靚仔使唔使幫手，攞兩蚊去賭，唔計息㗎喎」。以往我見到哩啲人，我最多只會回應"唔使"，但今次唔知點解會多口問佢一句"點計數"。跟住佢就同我講，唔收息，但每落一注就要先抽2成，仲話輸左第二日還就唔會計息，會比我自己返香港。當時，輸到懵左嘅我，居然食左豹子膽咁，話ok攞2蚊黎。跟住佢就打電話，帶我去沙圈果個茶餐廳，跟住就有個好肥嘅男人坐低，攞我身份證。哈哈，宜家諗返自己真係癡能左綫，為左賭錢咩都做得出，講得出。個肥佬問我喺香港返咩工，我由於唔想講自己係學生，加上自己外形係黑黑實實果挺，所以膽粗粗話自己係當差嘅(諗返都想笑)，佢又問我守邊區第幾隊，我話觀塘唔知up咩第二隊之類，好似過到骨。又問我地址電話登記人之類，後尾佢當住我面打去電話公司核實左，跟住就叫我喺影印咗我嘅身份證嘅白紙上簽名，寫借據。跟住就比咗2萬籌碼，話上咩咩廳賭，我從來冇入過廳好驚比人溶左又第一次借貴利，所以我話唔好啦，喺返中場賭，佢地ok,跟住就入返賭場......(待續)
後記：經過上學期嘅痛苦潦倒日子，以為自己可以控制自己戒賭，點知一有錢喺手，就咩嘢痛苦都忘記得一干二淨，爛賭不顧後果嘅情況更加變本加厲，不只開先河問朋友借錢賭，甚至淪落到向傳說中嘅吸血鬼借錢。可憐嘅無知青年，身在龍潭虎穴，感覺好無助......
哩期開始，我會不定期增設"給世人的話"，希望用自己失敗嘅經歷給予一啲正面信息比果啲仲喺賭海浮沉緊，不能自拔嘅朋友。希望你唔會走返我嘅錯路。
給世人的話：其實縱觀我頭兩年嘅賭博過程，主要原因都係自己冇自製力(仲有一個原因下期會講)，接觸賭博前嘅18年，冇自製能力並未為我帶黎麻煩。但當冇自製力剛剛撞到病態賭徒，後果就一發不可收拾。如果你自問都係控制唔到自己嘅人，最好就唔好去賭場，唔好比機會佢開始。另外一樣就係，病態賭徒通常一見到自己有錢就老豆姓咩都唔記得，所以如果你覺得自己已經步向病態賭徒嘅程度，你就唔好比機會自己見到你有錢，將所有錢，收入，存款卡，信用卡都放喺你可以信任嘅人到。我唔敢講哩個方法可以完全解決，但最低限度會構成一個緩沖既作用，有人管住你啲錢，起碼唔會賭得太離譜。再絕啲，你可以同幫你keep錢嘅人講定先，如果你提供唔到咩野實質証明，所有你問佢攞錢嘅其他籍口都係假嘅，其實就係去賭。總之，你賭癮起，有人攔一攔你，總好過你自生自滅，自己鍾意點就點。
P.S. 我寫自傳並唔係要聖人勸人戒賭，但係要提醒沈迷賭博係都有啲底線係永遠永遠都唔可以觸碰嘅，輕則你要花好多年時間先可以行返正軌，重則你會萬劫不復，承擔惡果唔係只得你一個。我就係希望透過我經歷帶出哩啲野。(我現在係100%支持有節制賭博，亦冇再諗過會戒賭)
我開始泥足深陷，輸曬自己啲錢，有5張爆曬既卡不突止，今次仲大膽到同貴利借左2萬。貴利經過對我身份資料進行一翻核實之後，跟住就比咗2萬籌碼我，原本話上廳賭，我話唔好，所以就入返葡京二樓中場賭.....
大肥佬同個中女就帶住我遊枱，由於第一次借貴利真係好驚，果刻我都有少少六神無主，連搵枱都要聽佢地，係佢地唔係我搵。跟住肥佬就話"哩張啦"，咁就三個人坐低左。一坐低個中女就起勢咁寫路紙，當然係上下三路寫齊懶專業果隻，寫完睇多一兩鋪就叫我買，小試1000，挑拿星寫咁耐咪又輸......跟住就要比200佢(投注不論輸贏一律抽2成)，如是者買一鋪就抽一鋪。果時間中都會覺得啲班長，或者隔離啲賭客有時會眼望望我，應該係睇得出我借左貴利，周身唔舒服覺得自己好樣衰。跟住繼續買下又轉下枱，又輸，又轉下比條肥佬中女睇牌，最終都係極速清袋。輸曬又去返茶餐廳坐，一坐低肥佬就好豪氣話，攞多4蚊比你賭啦上廳賭啦，望你出沖呀。當時我已經輸到慌失失了，毫無主見就話好。佢就行開左一陣，返黎就一齊上廳。去到廳果度好少賭客，肥佬就攞左4萬碼黎，好似係泥碼。同之前喺中場情況差唔多，一開始就細注啲一，二千咁買，輸得多左就4，5千咁隊落去，間中佢地又會幫我落注，總數都係輸多贏少。由於廳裡面好靜，肥佬可能呼吸有少少問題，佢啲呼吸聲扯下扯下咁，果陣嘅感覺唔知點形容，總之係好驚好唔自在，再望下隻錶，原來自己已經喺葡京入面18個鐘冇停過咁賭，冇出過賭場一步。過左個零鐘，果四萬蚊終於都輸曬埋，跟住又去茶餐廳。佢問我仲賭唔賭，果刻已經借左6萬，我真係唔敢再攞落去，其實開始決定借錢果刻，我都未諗過輸左可以點還，初頭諗住借2萬要問人借都好借吖，點知宜家係6萬。跟住就講返到香港點入數等等，然後有個後生少少同我坐啲士去碼頭，出張飛比我上船，佢睇住我入閘就走左。佢地算係有守諾言，真係比我自己一個返去，亦都冇話要收息，總之聽日入返6萬就冇事。
上左船，真係好徬徨，點還條數....諗諗下就訓著左。終於返到屋企，果陣應該係零晨5點左右，屋企人應該訓曬覺，但鎖匙一開，全屋啲燈都著住，第一個就見到我阿媽佢冇出聲，但睇得出佢個樣好無奈(眼紅紅咁)，再行入啲見到我老豆同大佬家姐都喺廳坐住。我扮若無其事問佢地，哇做咩仲唔訓，阿媽就開聲問我去左邊，我唔記得左點答總之係吹水，跟住佢地就繼續chok我，老豆全程只係聽冇出聲，最後阿媽問左一句，"你唔係去澳門咩？"。果刻一直堅持嘅我，情緒開始崩潰，最後都承認左亦都開始喊，阿媽繼續問"咁你借左人幾錢"，我話6萬，佢就鬧我哩啲錢都夠膽借.....阿媽都開始情緒崩潰，因為佢發夢都冇諗過心目中嘅"乖仔","大學生"居然會係個爛賭鬼，真係諗都冇諗過，宜家甚至大膽到問大耳隆借咁多錢。跟住就講左一輪肺腑之言，最後問我"你有錢還咩"，我當時再次dup低頭嘆氣話"冇"。原來條僕街貴利肥佬，喺我借最後4萬之前，佢就已經行開一邊打左電話去我屋企，話我喺澳門輸左錢，叫我屋企搵定錢屬我，佢地係其實想探下屋企口風，如果再借比我屋企有冇錢還，撲佢臭街，真係賤度呢.....
跟住大家都冇訓覺，諗住等銀行開門，阿媽佢地就去攞錢。之前提過我屋企環境係絕對唔好，老豆50歲就退左休，佢辛辛苦苦儲果30萬嘅老本，因為早幾年由公屋搬去居屋，連埋裝修等等都係剩返果4，5萬積蓄，所以果刻銀行只可以攞到4萬蚊出黎比我還錢，仲差果2萬就我大佬幫我問佢女朋友借住先......真係好對唔住佢地。朝早攞完錢轉返啲錢比貴利，跟住大家返屋企訓覺。犯左嚴重大錯嘅我更加係一直哩埋喺房，冇面面對屋企人。雖然我哩個衰仔錯得咁緊要，但阿媽知道我係超級唔開心，完全唔想見人。果晚佢同家姐講，你細佬好唔開心，佢提議一齊出街睇戲，就係咁我地全家人夜晚去左睇"鐵達尼號"，我老豆老母自從我地大個左之後，都冇同我地一齊睇過戲(果次之後咁年到宜家，我叫親我老豆佢地去戲院睇戲，佢都唔去)，可想而知佢地當時係幾咁錫我，為左令我開心啲，發起一家人走去睇戲。回想起，我有哩啲屋企人，真真正正係我人生裡面最大最大嘅收獲，而我卻唔珍惜佢地........(待續)
