賭海18載-2集（轉）

上文提到我大佬教識左我係信用卡到可以透支現金，15000額㩒左6000蚊出黎，但錢都未比佢，跟住袋哩6000飛身過左大海。戰場都係葡京，玩大細。經過一輪數小時混戰後，6000蚊全敗。不服輸既性別驅使我㩒埋張card果9000出黎，可惜結果輸凈千零蚊，望下墻上既鐘，已經係零晨時份，正常應該要返港。可能當時已經好攰，好想休息訓覺，於是就帶住疲倦身子由舊葡行去第一次去澳門就住果間假日酒店(差館對面），果時酒店冇依家咁貴，應該五六百到，入住左就諗住第二日返香港。當晚訓喺床上，少不免回想下當日血拼既情況，居然冇任何自責或後悔既感覺，諗下諗下就訓著左。第二日大約中午醒來，心裡感覺很不爽。琴晚因為太攰，所以輸左就尻就，一尻就訓著左，唔算肉痛。但輸錢肉痛嘅感覺永遠最痛就係你長眠訓醒，睜開眼果刻就開始有。心裡赤赤痛，同埋返去點還錢好呢，果時又冇做兼職......突然好似有魔鬼提醒左我，"有賭未為輸，你未輸曬架，打開銀包睇下先"。跟住我就彈起身睇下銀包，係喎仲有張道亨card喎.....當時既心情應該有啲罪惡感, 但果條暗暗地埋藏係身上十幾年既賭根已經戰勝左罪惡感了。但張card果時仲未開封架，仲有張要你打去card centre確認果張label...跟住就用房間電話打長途去centre, 原來好容易，係人工服務㩒幾個制就確認左張卡了。收綫一刻，疲倦既身軀都似食左偉哥敢，精神曬。

起身退房食野大約2點左右就去返葡京大撻地，繼續都係大細，果陣未識玩家樂仔。因為冇密碼，所以要去賭場碌籌碼，碌盡15000，我記得好似手續費大約5%到即係7百幾，所以第一次用哩張卡就爆卡。開波了，一開始既情況都唔係好好，一直下水，應該差唔多輸淨5000左右，係地下中場遇到張大細既長龍枱，最後就係靠果張枱由5000打返上3萬零一兩千度，即係連埋啲手續費，應該啱啱打個和。可能果陣仲未成魔，如果唔係，打和，以我既性格係冇可能會走，但係最後都決定回港。

回程時候，雖然實際係冇錢贏，但果份失而復得既感覺令人心曠神怡，加上從未試過手上有成3萬蚊cash,雖然係銀行既，但感覺依然唔錯，慢慢已經當左哩啲錢係自己.....(待續）

後記: 值得一提，果陣時唔識咩叫做扒仔或者疊碼，總之有陌生人同我講"靚仔使唔使幫手呀？"，都以為佢地就係傳說中嘅大耳窿，由於我個人一向幾有禮貌，所以起初佢地問我既時候，我會好有禮貌回覆"唔使"。而當年葡京大撻地既所有扒仔中，有一個比我最深刻印象，就係好似"魯芬"果個大山婆，我從來冇幫襯過佢，但佢"出眾"既外表令到十幾年後既我對都仲記得佢個豪氣款。唔知各位師兄仲記唔記得呢?佢通常都地下中場出現。

經過今前大起大落而又大難不死，我既成魔之路開始成形了。而不顧後果既性格首次喺賭枱上表露無遺。由一個從來冇諗住用張卡，直至係兩日內碌爆左兩張卡，雖然有多少既罪惡感，但已經被果啲花呢花碌既銀紙同埋刺激既賭博過程吸引左了。可憐既係，手上攞住前所未有咁多既30000大元，一直沾沾自喜坐船返港.....不知大難將至。

我由一個從來冇諗住用張卡，直至係兩日內碌爆左兩張卡，但好好彩攞返30000返黎。返到屋企果晚就比左6000我大佬，當然冇同佢講喺澳門既瘋狂經歷。手上攞住前所未有咁多cash 25000度, 正常人應該會找返曬落啲卡數度。但係已經準備成為賭魔既我，唔捨得入返去，因為我正在謀算不久既將來，我又會要去澳門。

假期未完，終日無所事事，唱K落D,無無聊聊。喺淨返個假期入面，中間來來回回都應該去好幾次，但未能一一盡錄，不過有一，兩次係值得一提，自從上次credit card 30000事件，之後去果好幾次都係順利，就咁樣，我自己戶口就有歷史性既存款大概10萬左右，間唔中又買下野獎勵下自己。

以下係其中一次。哩次過大海，除左結果係贏左萬幾蚊之外，仲有兩件事值得記低。第一就係終於膽粗粗學識左玩家樂仔，仲要有不錯既戰績，因為我自17歲就學人食煙，所以多數喺二樓中場度玩，冇記錯當時中間只得兩張大枱(一張有十幾個位果啲）。自始之後我亦覺得百家樂都幾易玩，又唔使輸圍色。第二樣野，喺凱旋回歸返到碼頭之後，喺信德啲電話鋪度買左部當時最新款既Nokia 398, 真係撲得死人果啲呢，作為獎勵自己。大家應該好清楚，贏返黎既錢係使得最High，部機盛惠3300，一口 say yes. 離開信德就直接飛的去九龍城參加中學老友聚會睇戲酒吧直落。睇完戲，就同一個要好朋友阿K(此人喺往後既故事佔重要角色)傾計，我就順便攞我部新電話出黎曬下，同埋分享下近來喺澳門嘅風光。阿K聽完之後，就用左幾重嘅語氣吊我，因為佢阿媽係澳門人，啲舅父係喺賭廳到搵食，可能佢聽過唔少賭仔既故事，所以對賭好反感，而佢份人又不嬲好串咀，所以就不留情面咁串左我幾野，同講下啲道理。當時正處於意氣風發嘅我，為左緩和氣氛，所以就支吾以對，話"得喇得喇"，但係暗地裡佢既說話又點會入到我耳仔呢。

哩一次就結束左。講埋下一單就要訓覺了。讀左大學之後，我仍然有踢阿鴻生隊波，當然間中會見到啲波友啦。當中一個以前住我隔離邨既隊友阿飛同我好啱玩，所以我都不忌諱同佢分享澳門既野。阿飛喺中五畢業就出黎考到消防員，所以已經做左幾年野，有啲貨，跟住我地就約埋一日等佢放假過大海。好記得去到一開始係一齊賭，但成績麻麻，所以之後就分開左賭。經過一輪苦戰，我最後最上返水，又執佢萬零蚊。喺我行落去地下中場搵阿飛既時候，嘩見到佢一鋪買成5000，果鋪大細仲要中左，(我果陣雖然已經賭到入魔，但注碼都係500~3000到，從未買過5000一鋪)，跟住問佢咩境，佢話贏左3雞幾，正呀。佢話夠皮，我原本落黎就係想揾佢走得未，但見到佢贏3雞幾，自己得果雞幾，心裡好羨慕，好想好似佢索咁多。不過最後都走左，返左香港。回港途中，大家都捉雞成功，成個船程當然心花怒放，暢所欲言。

後記: 自此之後，阿飛就成為左我既唯一賭友。

下期預告: 再次同賭友阿飛征戰，結果從此彼此關係變得疏離，到底咩事？