眼見有位人兄,話想用三千本過大海博殺有感而發
話說小弟自2011年尾,每個月都會過一次大海。
當時大把細場,包括水晶宮,法老王,以前的舊回力,百家樂檯每舖一舊水有交易,係巴比倫個靜靜地既場,買一舊水可以大爺咁甩牌,所以當時自己只帶1700精兵,再加三百蚊船飛,輸盡都係兩千。
近一年,好多賭場都加到最低兩百起步,自己帶既本金,會比以前帶多一千。
前前後後過大海兩年,自己戰鬥成績係扣除所有兩年來的船飛和食野等成本,剛剛好打過和。(當中包括三次自助晚餐)
講得好聽就叫賺左玩,免費吃喝玩樂。講得難聽又可以叫浪費光陰,用假日呢d時間來增值自己,可能係其他方面又更理想的回報。
小弟每次過大海的金額,可能好多巴打話,得果咁少本,番屋企訓覺算。
我自己就每個月set哂支出budget,自己每個月人工15k,每個月用3k過大海,呢3k佔每月兩成支出,當是果個月的娛樂費,輸哂對生活都完全無影響,因為本身自己多年來有儲開錢和股票等等,所以每次出征澳門,心情都十分輕鬆,純粹是當relax娛樂,享受快樂的時光,所以賭起上來毫無壓力。
下注方面,由於是志在娛樂,無話訂好目標要贏幾多幾多,所以我每次都只去細場買兩三百一注果d,預八至九注波幅,輸哂就走,絕對唔會玩果d真人機,因為始終覺得有牌甩下,先至過癮開心d。
根據兩年來經驗,雖然本金比較少,但每次都可以抗衡都好長時間,最差果次都係1.5小時被ko,贏最多果次都是贏七千。
自己除左賭場外,都會去食下好野,係澳門好多時候自己一丁友,會食幾舊水一餐,絕對唔會食廿零三十蚊刻薄自己。因為當一舖最低投注都兩百,贏同輸都相差四百,所以兩三百蚊一餐,絕對唔覺得貴。相反自己係香港,好少會食咁貴。
至於賭百家樂心得,自己可以話無,有的就個個唔駛番工啦。自己就中意買庄,好少買閒,所以多揀一d庄比較旺既檯,對子果d好少買,咁難中不如用來食埋佢好過。
每次自己出征前,都會把所有提款卡和信用卡抽走放係屋企,只帶2700本金,八達通和船飛,以及預出發前去定馬會買一張五百蚊的現金券,萬一作戰失敗清袋,回來香港都可以兌現番現金。
始終賭場是一個暴露人性弱點的地方,免得到時輸哂唔甘心要追數,呢家野唔駛多,衰一次足以致命。
最後,祝各位巴打百戰百勝,長賭長有,最重要的是量力而為。
