真實的贏錢養家故事

關於呢個古仔，我唔會亦唔敢吹水，因為主角就係家父，去年已經過左身。。

細個係鄉下，佢已經係賭神，玩車馬砲果種紙牌，贏到有田有地有馬仔，連我阿爺輸果d都比佢贏返泥。收尾共產黨殺到，先至放棄一切，舉家偷渡。

來到香港，做左泥工，原本窮人家庭一個，冇乜好講，點知。。。出事

我大哥冧棚插穿條腸，二哥工傷入廠，阿媽住院，老豆失業，去揾野做仲比人呃左80蚊“制服費”，真係傑

冇法子，唯有刮竹揾食，好似話一圈牌抽四蚊水，我果時好細，記得老豆有時成日唔係屋企，有時成個禮拜唔出街，原來手風順就狂打，手氣唔好就縮沙，如是者，一道難關，就靠一副麻雀度過。佢時時都話，當年有天助，贏返泥既錢，啱啱夠開銷，總算唔錯

唔止咁，我大哥結婚d錢，都係靠老豆一條連贏2X3搞掂，我記得其中一隻馬係永同歡

可能係小時候呢番經歷，我唔抗拒賭博，出泥做事之後都有過一段迷賭日子，都輸得幾慘，可能心智成長左，覺得老豆之所以贏錢，全拜“保本第一”的賭博手法所賜，運氣反為其次，我慢慢磨練，向馬仔埋手，都識到班“有料比”之人，時至今日，我相信我唔會有大輸既一日，因為我根本唔會大賭，總之“保本第一”。

戒賭係保本最高手段，如果你想贏，大前提係唔好輸，贏錢穀唔穀，見人見智，但輸錢就一定要縮