甩牌 所帶嚟既感受

其實大家都知 , 你又唔係  賭聖 , 你點甩  嗰兩隻牌都係唔會變既 ! 但係點解仲係咁多人鍾意  甩牌  呢  ?  有啲人仲特登買大啲爭牌睇添 ........

小弟  賭齡尚淺, 但 賭權未開放時 已不知留低幾多腳毛喺澳門 , 都差不多廿年喇 !  初時都係一班人入去玩嚇大細  , 一二千銀上落都叫做好攞命 .........

漸漸哋, 大家都知發生咩事, 輸錢 皆因 贏錢 起 , 我亦相信呢條路好多人都走過 , 不少人亦會有共鳴. 

開頭玩大細 , 真係 淨係買大細 , 又符符碌碌咁買咩都中 , 之後就睇嚇人哋買點數, 我又跟住買  , 又贏又輸咁 , 幾刺激 !

都唔記 得幾時開始 , 見人哋玩廿一點 , 我又走去玩 ! 見人哋玩 8+6  , 我又叫佢教我玩 ...........

咁就死火喇 ! 識多樣 就衰多樣 , 係 冇錯  , 甩牌  所帶俾你既感覺係幾刺激既 !

以下呢次經驗 , 希望同各位分享嚇 ! 印象之中 , 我應該有講過, 以前係用另一個名. 不過唔緊要,就講多次啦,或者有人冇睇過呢!

有次執咗兩雞零嘢 , 咁就諗住走人啦 ! 去到碼頭攞咗船飛 , 見仲有成半個鐘先落船, 咁就近近哋入去賊船 , 開頭冇諗住玩, 至在入去涼嚇冷氣同埋睇嚇人哋玩 ! (註: 賊船即係 皇宮, 摺咗好耐喇 , 位置就喺而家海記對面 )

睇睇嚇人哋玩 , 就開始忍唔住, 係, 我係衰, 衰定力唔夠, 諗住細細哋 玩 $500 , 贏多 $500 返去買對波鞋 ! 

你哋知啦! 當時賊船都就快摺埋, 冇咩客 , 啲荷仲多過客咁滯 ! 大家見我咁講就知 , 我出事喇 ! 一心諗住想贏多 $500 , 到最後 .............

第一局 $500 買閒 , 自己睇牌 , 唔記得咩牌 幾多點 , 總之就係輸 ..........

當時心諗 $500 輸咗 , 好 , 第二局 就買 $1000 , 點知 ..........唉 , 又係 .......... 仲好似俾人一槍過 , 我又輸 !

有少少著火喇 ! 有理冇理咁多 , $2000 換碼 推去閒 , 點知 , 又 .......................... 輸 !

第四局我同自己講, 點會咁黑仔 , 我又死唔信邪 , $4000, 又要買閒, 結果 .......................又係輸 ! 四局牌 輸咗 $7500. 

當然 $7500 ,對好多人嚟講, 可能係好細既數目 ! 但係當日我係贏咗錢諗住走 , 輸咗 $7500 就得番兩雞 ! 

我諗冇嘜邊個會順氣既 , 好, 幾大就幾大, 燒賣就燒賣 , $8000 去馬 ! 其實, 大家都知我當時係玩緊 死亡 欖 .

第五局  $8000 買閒 , 呢局我好記得印象深刻 ! 第一隻 , 冇邊 , 好 , 唔睇住, 甩埋另外嗰隻先 , 咦 , 一甩 ..................係三邊喎 !  咁就再睇番第一隻先 .........甩 呀甩  .........  都 甩咗幾耐嚇  ,  我好醒呀  甩到隻   煙出嚟 !

咁就個心定過炸彈啦 ! 煙屎  撞 三邊 , 快活過神仙  ............

都要甩埋另外嗰隻既 , 我係咁叫  頂  , 頂呀  , 頂  , 頂  ..............

頂咗一邊 , 又甩 , 甩 ........  唔生性 , 頂得一粒 , 係 7 仔 . 我 閒  , 8點 .........

之後到莊甩 , 係個男人甩 ! 佢一甩  , 第一隻爆響口話係電視機 , 到甩第二隻 , 後面有人嗌四邊 , 我當時心諗  四你老母 ............

之後佢話 , 係 , 真係四邊. 當時個心真係沉咗一沉 , 唔係啩 , 唔通個天都唔鍾意我 , 唔俾我走, 我只係要贏番呢局 , 攞番萬六銀走人啫 ..........

當時一路摣實拳頭, 個心一路就好想隻 牌係 10仔, 不過係冇講出口咁解啫 ! 我見佢一路甩 , 個口又口嗡嗡咁都唔知嗡嘜尻嘢 , 佢後面有個女人係咁嗌吹 , 佢就笑笑口咁 , 好撚耐都唔開牌 , 你哋知啦, 一生一死 , 生死關頭, 真係秒秒鐘都好慢..........

而家諗番, 佢甩隻牌都可能有成半分鐘 , 我個心就一路係咁震 , 震過貓王 震足半分鐘 , 又摣實個拳頭 ! 佢望嚇我, 我又望嚇佢, 我覺得佢似係有些少  奸笑咁 , 佢又唔開牌, 後面啲人都唔知睇唔睇到隻牌幾多點, 係咁大嗌吹呀  吹  吹  .........

最後, 佢都係冇開隻牌 , 就咁俾番隻牌班長 , 班長一開 ............................ 10 ! 我即刻彈咗起身, 呼一大口氣 .........

等埋班長派碼 , 然後即刻去換返啲碼先 , 成 $16,000 ! 攞咗錢 , 突然間醒起, 我係唔係有啲嘢要做呢 ???

係呀 ! 我攞咗船飛呀, 一睇錶 , 嘩  , 原來玩呢五局牌 連埋換碼  攞番錢 , 足足成 25分鐘咁耐 , 我即刻有理冇理咁飛身走人 ............... 最後請大家估嚇我趕唔趕得切呢班船呢 ? 

好彩, 係  趕得到既 ! 可能有人會話 , 趕唔切咪下一班囉 , 等 多半粒鐘啫 ! 我就係唔想等 , 等多半粒鐘 , 容咩易我又出事架 ..............

呢個係我其中一個幾深刻既經驗 ! 亦都係想同大家分享嚇 , 甩牌 , 冇錯, 係幾刺激既 ! 尤其是一生一死關頭 ........

亦都順便帶出, 賭錢 .................. 唔好玩欖 , 直欖樓梯欖咩欖都死 , 仲要死快啲 ........

多謝大家收看 !