告別單身要戒的3個壞習慣

單身，呢個term足以令一眾女生聞風喪膽！可能你唔係無人追，不過心底裏仍然覺得真命天子仲未出現。其實，單身絕對是選擇，唔好以為單身就係「慘」，就係「寂寞」。單身係一個好難掌握得好嘅status，如果你心態唔啱，就算表面有幾風光，你都唔會生活得開心、自在。想做到fabulous single，你要提醒自己戒咗以下3種壞習慣：

1. 你只識數臭男人
越嚟越多人話港女串、睇唔起人，不過唔難發現好多單身女都總係鍾意聚埋一齊高談闊論，個個牙尖嘴利，數臭男人！呢一type單身女講嘢尖酸刻薄，踩人踩到盡，以為加些少知性嘅包裝就可以hide咗個「八卦」樣，令自己感覺良好。不過，佢哋無發現自己講嚟講去嘅話題咪又係離唔開男人、男人同男人？！結論係男人唔夠好，自己單身都絕對係被迫嘅。Well，如果你keep住呢種心態，只係識搵人哋嘅壞處，丁點好處都睇唔到，又唔諗嚇自己都一樣有優點同缺點，咁樣你想告別單身都幾難。

2. 你將所有青春獻俾工作
「受人錢財，為人消災」，係嘅，收得人哋人工，就應該好好努力打拚。不過，喺付出腦力體力同working hours之外，其實你要諗嚇有無需要將僅餘嘅私人時間都獻俾工作﹖如果約咗有機會可以發展嘅異性食晚飯，你接到電話又即返公司做嘢(明明件事唔係咁urgent)，人哋會點睇你先﹖機會都俾你白白miss咗！所以，唔好再自欺欺人喇！以為自己單身就係因為工作太忙！「事業女性」、「workaholic」等等稱號可能證明到你好能幹，但亦同時反映你無社交、無其他嗜好、無異性（甚至同性）朋友……所以唔好再浪費你嘅青春啦！

3. 你將Social media當成你生活的全部
今時今日Facebook、Instagram、微博經已融入我哋生活嘅一部分。一開始可能見身邊同事同朋友有玩，你又會玩埋一份，可能係因為潮流或者人有我有嘅心態。最初可能都只係上載嚇無聊相，想同朋友分享你嘅生活，擴闊一下社交圈子，但慢慢你電話不離手，越寫越深入，因為不甘寂寞，想有人關心你，你啲post唔係感懷身世，就係傷春悲秋，係人都睇得出你好lonely、自卑自憐，負能量爆燈，追求者都未必會搵上門啦！無錯，Social media絕對可以係我哋生活嘅一部分，但你有必要諗嚇佢哋需唔需要係你生活嘅全部﹖