【賭場成長日記】(真人真事) - 第5集

數數手指,由一開始叉隻腳埋去賭場個一日計起,唔經唔覺都係賭界"撈"左成個月了。有人撈到風生水起,而我就...唉,屌你老味!好勝又死硬頸既我又點會向賭場屈服丫...諗黎諗去,條氣都係唔順,與其逃避輸既命運,倒不如去鑽研贏既方法,決定用時間去搵出賭場既弱點!

好傻好天真既我,足足用左成個幾禮拜既時候去刨熟哂網上面所有關於百家樂,廿一點既資料,有D野摣係手,下次去返賭場都冇咁怯丫嘛 好!萬事俱備,執好哂D行季,聽日出發同佢死過。

為左令自己唔好撚再賭通宵,所以今次揀係朝早八點出發!出發前對自己千叮萬囑:「今次睇定D先好落呀,贏左就好走喇...唔好撚再諗住追返之前輸個D呀。」

半粒鐘車程後,禁完賭本就去買船飛。唉...!真係就黎同賣飛個位呀叔做埋朋友,發夢都就黎諗起佢我唔想他存在我深深的腦海裡~話咁快就到左永利,將手上既一萬蚊本斬開兩份,先賭百家樂,後賭廿一點。

自此之後,永利就變左我既主場,原因好簡單,永利係飲品上面真係做得幾出色,有好立克,牛奶,可樂,橙汁,紅牛,咖啡,啤酒,總之就乜撚野都有,選擇多好多相比起金莎D野飲選擇好少...加上D荷又極之西面,永利都唔算話好,但起碼叫正常,金莎個D真係西口西面到想車巴佢,態度又差撚到爆!



一開波,去賭抽水臺百家樂,輸兩三口就起身四圍兜啦。原來呢個場仲有另一種可以買龍既百家樂,冇得甩牌,淨係莊贏或者閒贏,冇得買和。咁我就坐低玩呢種百家樂啦,買莊開閒,買閒開莊,幾經辛苦有一口買莊中左,點知就開龍,操它媽的逼。曾經一度懷疑佢老味係咪出千,追住殺,俾佢啅左二千。觀察所得,師奶多數會聚集係呢D臺,大部分都係博中龍一賠四十但係我以後都冇再掂過呢種百家樂!

輸左幾千,成個人頹撚哂!諗諗下,未係呢個場買過大細,反正都係輸,冇理由買乜輸乜,決定埋去賭幾口大細點知,三百蚊平注落,買十鋪贏八九鋪,俾我追返二千幾見好就收,所以冇再買落去,跟住就走左去醫肚回一回氣。

食完野返黎下半場,轉玩廿一點,由於未係呢個場玩過廿一點,所以周圍遊下臺,睇定D先。遊遊下見到張臺,有個男人同莊對賭緊,見佢好似好撚勁咁,臺上面有幾棟一千蚊碼,下下成棟成棟咁落!拿拿聲走埋去坐低諗住執幾千!

點撚知佢,一見我跟注,佢就唔買,對眼啤到恆一恆,好似殺左佢全家咁!我唔係搭佢注,我只係跟注姐,咁都得罪佢,唔係下話而呢一個經歷亦都係我玩廿一點上既第一堂!雖然你係絕對有權跟注,唔需要得到個門既門主同意。但係跟注之前,點都要有禮貌咁問聲可唔可以,通常你開口問得都俾你跟,和氣生財,大家客客氣氣,贏左就一齊開心,輸左亦都賺左個過程!

我見佢啤到咁恆,我即刻笑住口咁話:「不好意思,可以下嗎?如果你介意的話,我就不下,我在旁邊看就好。」即使係做到咁,佢都無動於衷!我眼望佢眼,希望佢俾我跟,佢眼又望荷官眼,希望荷官出聲叫我走,荷官眼又望我眼,示意我係有權落注唔撚洗理佢,我眼望返荷官,達成共識,荷官最尾望返個大陸男人,最後佢先勉為其難俾我跟但就由一鋪一棟咁落,變成一鋪落幾千,最後我都索左幾千,好黎好去,多謝完佢就起身轉臺。

贏返幾千,暫時都係平手,所以成個人好淡定,亦都唔急住贏。兜兜下又俾我見到有張臺,又係有個男人同莊對賭,又係成棟成棟咁落,但唯一唔同既係,呢個係香港男人,亦都好好禮貌,仲問我跟唔跟注,所以話,教育係幾咁重要,文化差異唔可以決定你既輸贏,但係可以決定你既質素!

有左先例,但今次冇跟注,因為佢一個人開兩門,一門贏一門輸,所以我淨係坐係隔離睇點玩。佢已經熟練到唔洗諗,一棟一棟咁落,輸左亦都面不改容,由我坐低開始,見佢經過幾次分牌同加注,已經贏左幾萬,加埋佢手頭上D碼,起碼有成廿餅野。

跟住落黎個鋪牌,莊6仔面,佢開兩門,第一門一對9,第二門一對8。佢第一門分牌,第一隻9要牌,黎多隻9,再分,即係第一門有三隻9,三隻9都分別加倍各補一隻牌,各黎左一隻公,即係三對19點。第二門第一隻8分牌,又黎隻8,再分,然後同第一門一模一樣,三隻8分別加倍各補一隻牌,黎左一隻公兩隻A,即係一對18點同兩對19點。

即係依家臺面上有五對19點同一對18點,加注加倍夾夾埋埋落左成十幾萬。係對住莊6仔面既情況下,只有係莊補牌黎隻A,夠17點,又或者補牌補到爆牌既情況下,個男人先有機會贏。我坐係隔離睇都睇到心跳加速,成十幾萬。但係佢就面不改容,淡淡定定咁等結果。

好喇,莊補第一隻,黎左隻7,即係13點,只要黎多隻4/9/10/公就贏硬,諗住實食冇癡牙啦,點知...估都估唔到係有3隻8既情況下,莊補第二隻牌,黎左隻8,就係咁,莊21點,通殺,就咁就冇左十幾萬。係個鋪之後,我知道係賭臺上面,由其係廿一點上面,冇野係冇可能,你摣幾大既牌,甚至乎摣廿一點,你都可以輸,相反,摣12點都可以贏,千變萬化,亦都係廿一點刺激之處。

我完全唔覺得個男人有任何肉赤既表現,果然,經驗係需要累積,見慣大風大浪,一鋪輸十零萬,濕濕碎啦。係個一刻我問自己,要賭到幾時先可以去到咁既境界。輸左鋪大牌,個男人繼續玩,亦都係開兩門,但注碼就細左好多,跟住落黎係一個鐘之內唔單止贏返個十幾萬,仲倒贏多十幾萬!除左補牌既技巧之外,跳注亦都係佢贏到既關鍵,由最低注三百一注,到成皮野一注,完全乎合到係賭界經常提及既贏錢一大守則-贏穀輸縮。

坐左係到上左成個幾鐘堂,係時候要親自落場試下,睇下學到幾多野!我有樣學樣,去左張空臺到同莊對賭,淨係開一門,分半鐘都唔知有冇,五百蚊平注連贏四五鋪,贏左二千幾,心諗,以呢個贏錢速度,番本之日,子日可待。

點知夢想破滅既速度仲快...僕佢個街,莊摣細牌,最尾補牌唔係19就20點,連輸幾鋪,跟住見佢公仔面,自己又摣住d中間牌,15呀16呀個d,補又驚爆,唔補驚輸,就揀投降啦,點知由下鋪派出黎既牌計返,如果上鋪唔補牌,莊就會爆牌。,係三分鐘之內輸返凸俾佢。

點撚知最穀氣既唔係輸,而係輸緊個陣,個super走埋黎睇,我一路玩,佢一路耍手檸頭,一路發出嘖嘖聲,又唉又盛,仲要補多句:「唉喲...陰公囉,乜係咁輸呀,因住輸到冇埋D船飛錢呀~」係個一刻,我相信冇人會忍得到!  我曾經嘗試抑壓自己既情緒,但真係忍唔撚到,我即刻屌鳩佢:「講乜撚野呀你,係到呀之呀左,你係咪未俾人屌過呀,你平時係咪用咁既語氣同態度去挑釁D客架?」

跟住條僕街聲都冇,條氣好撚唔順咁走左。真係幾好情緒都好難忍得到佢走左之後我繼續玩,大上大落一輪,最尾平手再多一千,扣埋食飯加船飛既錢,今次算係打個和。望一望隻錶,都成夜晚十點了...飛的去碼頭搭船返香港,今日,錢就冇乜收獲了,但係就得到玩廿一點既經驗,算係有得著啦,返去好好咁訓一覺,擇日重賽!
待續...