【賭場成長日記】(真人真事) - 第4集

由於賭親百家樂冇好結果,賭咁多間都輸到僕街而同一時間,上次係賭場因為得到呀叔既教路,過左幾招俾我旁身,所以跟住落黎個幾集所講述既故事大部分都係圍繞住我係玩廿一點既時候既各種經歷,將會由淺入深咁去為大家剖釋我內心既感受,慕求令大家可以仿如親歷其境一樣,透過文字去重現各種精彩鏡頭!

上次賭左一日一夜,賭遍氹仔三大賭場,夾夾埋埋輸左皮幾。無可否認,當時成個人真係頹到僕街,由個朝搭早班船返香港既時候,亦都深深咁開始明白到,點解次次坐船個陣,都咁撚多呀叔鐘意用憂鬱既眼神係座位到望住個海。佢地好似定左格咁,我從佢地眼神中,甚至睇得出佢地係想回帶,想返番去幾年前...或者,係幾十年前,未開始賭個陣...

但係天意弄人,時光又點會可能倒退得到丫...外表睇落無穿無爛,但其實佢地個心已經俾賭場既百家樂毒箭,穿過唔知幾多萬次,個心都唔知貼過幾多塊膠布、查過幾多次紅藥水、聯過幾多次針,先至免強可以撐到今時今日望住呀叔D頭髮,漂下漂下,同海上面既波浪相映成趣,但兩者就有著截然不同既命運

海浪鐘意去邊就去邊,自由自在,而呀叔D頭髮就想走都走唔甩,就好似佢當年咁,叉左隻腳埋去賭場,以後無論點兜,從邊個方向行,最終都會行返去賭場既入口,周而復始...無奈既係,去賭場既路係一條單向既行車線,可以話係一條不歸路,但其實由賭場出返黎,你架車開往既下一站,咪又係摣返去賭場既入口...所以,亦都可以話係一條"歸家路"。

賭場有俾機會你走過架喎,但係,鬼叫你咁鐘意飲"屋企"煲D百家樂湯咩!煲湯D料由幾千蚊到幾餅野不等...視乎你有幾重視呢煲湯既質素啦!飲左一排,突然間發覺口啖啖,冇理由正係得湯,冇送嫁,"呀仔"開始柞型喇。於是"屋企"話:「你俾D"家用"正係夠煲湯炸!想有其他送,加加用啦!」

"呀仔"就反駁話:「屌你咩!我有幾萬個"兄弟",件件都有俾家用過你,而且你日日都生多幾百個"仔",仲話唔夠用!我依家淨係要求加多樣送姐,咁都唔得!?你點做人"老母"嫁!」

"呀媽":「屌你咩,屌自己老母!我呢個老母不知做得幾有板有眼,照顧得頭家tuptup掂,個個"仔"都好癡家架,個個月都成份糧俾撚哂我,咁你話丫,出面有邊戶人家D仔女會咁孝順丫!我都廢撚事同你拗,諸撚多要求!最多今晚加多碟廿一點蒸魚俾你喇,廢撚事俾出面D人講閒話,話我刻薄,有損我形象就唔好啦!」

"呀仔":「多撚謝哂呀老母!等我食飽D,有氣有力喇,今個月實行搵多D黎好好咁孝順你,答謝你日撚日既養肓之恩!」

從呀叔既眼神裡面,竟然睇到咁多野!所以話,知得越多,顧慮亦都越多想當日,我仲係一個賭場新手既時候,無牽無掛,無野好怕,所以咪贏到錢囉。賭場既目的唔係要贏你...而係要....你輸俾自己!

當你輸左俾自己既時候,你既理智、你既判斷力、你既自控能力、你既記憶力...已經陰D陰D咁趺撚左九成喇!賭場就坐定笠緣喇,雖然遍地都係各種簡單既陷阱,但係你就會不自覺咁....中完一個又一個,最後體無完膚,毫無半點還擊之力。

當你開始感覺到迷失...唔知自己做緊咩既時候,天花板上面密密麻麻既CCTV已經監控住你既一舉一動鏡頭後既監控人員係心入面嘲笑緊你,由一開始既自信滿滿,到依家似摣住隻碗,一個個活生生,血淋淋既故事,每分每秒都做緊直播....

唯一特別既係,呢個直播節目係,冇導演、冇劇本、冇對手戲...意味住冇人會嗌CUT,你唔會知道幾時先要停....由你踩入去賭場個一刻,已經開始ROLL機。而你...就係主角,你將會遇到既...對手,就係另一個直播節目既主角...

「劇本」?或者...已經唔再需要D咁膚淺既野喇!請相信我呢個"影帝"就算冇劇本...你都將會表現得好好、天衣無縫....
待續...