攞苦來辛之旅

09:30到達碼頭，見到處是蛇餅，噴射普通位賣緊15:30，豪華13:00,尊豪11:00。

去金沙會出免費飛，15:30普通位，跟著逃離現場食早餐先。11:00入閘搏後補，點知後補就係排到入閘口，半小時一班，每班補得幾個普通，頭等就多啲。

十二點幾過埋離境櫃檯，真正落船14:30算好彩了。落船後出定回程14:00安心啲。

到咗金沙先領取$100食券食午餐，登記郵箱送的。問房間要打幾多分？答覆108分但已滿曬。

轉往金龍金堡買泥碼取房，早在初一二問過要十萬同十三萬全包，所以帶住十三萬道具。點知初三又加價，金龍要廿二，金堡則十八萬先免費，結果在金堡買六萬補$1800。其他選擇是買三萬補$2100，或十萬補$1400。

安頓妥當後去官也街食水蟹粥，一小鍋$165,等如五碗份量，再加兩隻黃金蝦$110*2,埋單$424，然後過去钜記買啲手信。

飯後開工21:50直至02:00番攤檯收皮,第朝08:00落去食早餐，怎知09:00先有點心，咁就賭住8+6轉下碼先，到九點食埋早餐等攤檯開皮，一直戰鬥到11:30退房。

之後去金沙食午餐，鐵板燒要三舊水，唯有射鋪千五蚊三紅找數，見人地鐵板龍蝦唔差，自己點既和牛就揾笨七啦…一樣係$298。

總結:辛苦之旅，以後咪初二三去，自己食番好啲補償，回程船無乜人，應該係大陸客只返大陸不會返港。

轉剩兩萬泥碼下回分解，值得一提金沙的七喜8+6,藍色檯面八張檯$200起~1,500,000限紅。

無搞錯，俾機會賭客行纜，睇下往績，開閒無偏多，而多數客買莊免抽水，有興趣纜客可以計劃下。

戰績:8+6小勝兩千多，番攤執兩雞半，當係勤工獎。祝大家都羊羊得意！